cofrestrwch am newyddlen
Rhwydweithiau Cymdeithasol
Yn yr Adran hon
Gwasanaethau Eraill
Gwasanaethau Eraill
Mae GISDA yn cynnig gwasanaethau eraill sy’n ategu ein gwasanaethau tai â chymorth.
Bydd yr holl Ddefnyddwyr Gwasanaethau’n cael mynediad at y canlynol –
- Gwasanaeth cwnsela
- Gwasanaeth Cymodi
- Rhaglen addysg amgen
Rydym hefyd yn rhedeg gwasanaeth Cynghorydd Personol i bobl ifanc sy’n gadael gofal.
Mae GISDA yn cyflogi dau Gynghorydd Personol rhan-amser.
Mae Deddf Plant (Ymadael â Gofal) 2000 yn datgan bod hawl gan bobl ifanc sydd wedi bod mewn gofal i gael Cynghorydd Personol penodedig.
Bydd Cynghorydd Personol ar gael i gynorthwyo pobl ifanc sydd wedi bod mewn gofal; bydd yn gweithio’n annibynnol gan sicrhau bod barn a llais pobl ifanc yn cael eu clywed.
Mae Cynghorwyr Personol:
- wedi ymrwymo i sicrhau lles a datblygiad y person ifanc.
- yn gallu cynnig cyngor a chymorth ymarferol.
- yn helpu gyda Chynlluniau Llwybr unigol.
- ar gael i helpu pobl ifanc sy’n gadael gofal.
Gallant roi cymorth a chyngor ynghylch –
Cynlluniau Llwybr |
Gwasanaethau Cymdeithasol |
Tai |
Hawliau |
Budd-daliadau |
Cyllidebu |
Gwaith |
Materion Iechyd |
Addysg a Datblygu |
|
Mae GISDA yn cynnig gwasanaeth cwnsela cyffredinol sy’n gyfrinachol, yn broffesiynol ac yn ddwyieithog, i bob un o’n defnyddwyr gwasanaethau.
Beth yw pwrpas cwnsela?
Bydd gan bawb broblemau weithiau sy’n achosi pryder. Meddyliwch amdanynt fel jig-so dyrys lle mae’n anodd ffitio’r holl ddarnau i’w gilydd. Mae trafod problem drwy gwnsela’n debyg i roi trefn ar yr holl ddarnau fel ein bod yn gallu dechrau gwneud llun sy’n gwneud mwy o synnwyr i ni. Weithiau bydd yn anodd siarad â rhieni neu ffrindiau am bethau sy’n achosi pryder i ni. Mae cwnselydd yn rhywun y gallwch siarad ag ef mewn ffordd wahanol, rhywun a fydd yn gwrando arnoch yn ofalus iawn, na fydd yn eich barnu neu’n dweud wrthych beth i’w wneud. Pwrpas cwnsela yw’ch helpu i weld yr atebion eich hun, i wneud penderfyniadau a dewisiadau ac i edrych ar bethau’n wahanol. Gall eich helpu i deimlo’n well amdanoch eich hun.
Pa fathau o bethau y bydd pobl yn siarad amdanynt yn ystod cwnsela?
Beth bynnag sy’n bwysig iddynt neu beth bynnag sy’n achosi pryder iddynt. Gallai fod yn llawer o bethau gwahanol.
Beth bynnag sydd wedi bod ar eu meddwl – does dim sy’n rhy fach neu’n rhy fawr i’w drafod â chwnselydd. Drwy rannu’ch meddyliau, efallai y byddwch yn gallu gweld beth fyddai’r dewis gorau i chi.
Beth bynnag y bydd pobl yn ei drafod gyda chwnselydd, bydd yn gyfrinachol. Ni fydd cwnselwyr yn torri cyfrinachedd oni bai fod lle i gredu bod rhywun mewn perygl o gael niwed.
Fel arfer bydd pobl yn trefnu i gwrdd â chwnselydd yn rheolaidd ar adeg gyfleus ac mewn lle diogel.
Yn GISDA gallwch alw heibio, rhoi galwad i ni, gofyn i weithiwr allweddol eich atgyfeirio, neu anfon neges testun neu e-bost atom i drefnu apwyntiad preifat.
Prosiect newydd sbon yw hwn sydd wedi’i ariannu gan y Loteri Fawr sy’n ceisio agor y drysau at addysg a datblygu i’n defnyddwyr gwasanaethau.
Bydd Agor Drysau yn ceisio cynnig profiadau a chyfleoedd dysgu ysgogol a fydd yn meithrin hyder ac yn datblygu sgiliau a doniau cadarnhaol.
Bydd y cyfleoedd hyn yn helpu pobl i symud ymlaen tuag at ddyfodol mwy hyderus ac annibynnol.
Rhoddir cymorth i bobl ifanc sy’n gysylltiedig â GISDA i bennu’r sgiliau y mae angen iddynt eu datblygu a symud ymlaen i fyw’n annibynnol. Mae Agor Drysau yn ceisio cynnig achrediad am y rhan fwyaf o’r sgiliau a ddysgir.
Bydd y cyfleoedd yn amrywio o ddysgu i goginio bwyd iach, rheoli materion ariannol, ac iechyd rhywiol i waith theatr, drymio a graffiti. Bydd Agor Drysau yn cynnig dewis o weithdai, cyrsiau a chyfleoedd sydd â’r bwriad o addysgu pobl ifanc sut i sefyll ar eu traed eu hunain.
Bydd Agor Drysau yn canolbwyntio hefyd ar ddatblygu cyflogadwyedd defnyddwyr gwasanaethau, drwy ddatblygu’r sgiliau y mae eu hangen drwy gyfleoedd gwirfoddoli a gwaith menter gymdeithasol.
Pwrpas Agor Drysau yw dod o hyd i ffyrdd amgen o ddysgu sy’n ysgogol, yn ymestynnol ac yn hwyliog.
Mae gwasanaeth cymodi’n rhan o’r prosiect Agor Drysau.
Addysg a Datblygu
Mae rhan o’r prosiect ‘Agor Drysau’ newydd yn canolbwyntio ar addysg a datblygu.
Rydym yn ceisio rhoi achrediad (drwy Agored Cymru/OCN) am y rhan fwyaf o’r gweithgareddau a chymorth yr ydym yn eu cynnig.
Mae hyn yn golygu y bydd defnyddwyr gwasanaethau’n ennill cymwysterau gwerthfawr wrth gael cymorth drwy GISDA.
Gan fod y prosiect hwn yn un newydd, byddwn yn rhoi gwybod i chi am y datblygiadau.
Perfformiadau
Yn 2006 bu i griw o bobl ifanc GISDA gymryd rhan mewn gweithdy theatr fforwm. Erbyn hyn mae’r theatr wedi datblygu yn fenter gyffrous gyda phobl ifanc GISDA yn cael cyfle i addysgu eraill am broblemau sy’n wynebu y digartref. Bellach mae perfformiadau o theatr fforwm GISDA wedi cael eu cyflwyno i gynulleidfaoedd o gymunedau lleol, cenedlaethol a rhyngwladol.
Ond beth yw theatr fforwm?
Yn y 70au bu i’r cyfarwyddwr a'r addysgwr o Frasil, Augusto Boal ddarganfod dull Theatr Fforwm. Theatr rhyngweithiol sydd a thechnegau i addysgu pobl sut i gymryd rhan weithredol yn eu cymuned er mwyn taclo gorthrwm. Mae wedi cael ei ddefnyddio ledled byd er mwyn dod o hyd i atebion i broblemau, dylanwadu ar ddeddfwriaeth ac i ysgogi pobl i gryfhau cymdeithasau er mwyn gwell.
Defnyddir dull theatr fforwm gan pobl ifanc GISDA i gyfleu ar lwyfan eu profiadau personol o ddigartrefedd. Mae’n bwysig nodi mae’r bobl ifanc sy’n llywio cynnwys y theatr boed yn gymeriadau, stori a’r sgript.
Nod theatr fforwm GISDA yw ymgyrchu ac i ysgogi “newid cymdeithasol” drwy annog pobl o’r gynulleidfa i rhyngweithio â’r cymeriadau ar y llwyfan er mwyn cynnig dulliau gwahanol, syniadau a phosibiliadau ar gyfer goresgyn ac atal digartrefedd.
Does dim dwywaith bod cymryd rhan mewn perfformiad yn cael effaith bositif ar ddatblygiad personol unigolyn, megis
- gwella hunan hyder a hunan ymwybyddiaeth
- lleisio barn yn hyderus ac i herio safbwyntiau eraill mewn modd adeiladol
- deall iaith y corff wrth ymateb i wahanol emosiynau - mynegiant dilafar.
- cryfhau symudiadau cydsymud a sensitifrwydd y synhwyrau.
- gweithio fel rhan o dim ac yn annibynnol.
- dangos gorthrwm drwy gyfrwng drama ac actio.
Cydnabyddir Theatr Fforwm gan y Cenhedloedd Unedig drwy UNESCO (United Nations Educational, Scientific and Cultural Organization) fel dull bositif sy’n annog “Newid Cymdeithasol.”
Osian Elis, Hwylusydd Theatr Fforwm
"Math o wybodaeth yw theatr: fe ddylai ac fe all hefyd fod yn ddull o drawsffurfio cymdeithas. Gall theatr ein cynorthwyo i adeiladu ein dyfodol, yn hytrach na disgwyl amdano."
Augusto Boal – Sylfaenydd Theatr Fforwm
Perfformiadau Theatr Fforwm GISDA
Fel a nodir isod mae pobl ifanc wedi perfformio ar gyfer nifer o sefydliadau, cyfarfodydd, cynadleddau ac ambell i berfformiad mewn gwlad dramor.
Mae’r cynulleidfaoedd wedi bod yn gymysgedd helaeth o bobl amrywiol e.e. disgyblion ysgol, Aelodau Cynulliad, Aelodau Seneddol, cynghorwyr, Comisiynydd Plant Cymru, gweithwyr cymdeithasol, athrawon, gweithwyr iechyd a llawr mwy.
| Medi | 2006 | Cynhadledd 21ain GISDA, Caernarfon |
| Hydref | 2006 | Cynhadledd Sheltre Cymru, Caerdydd |
| Ebrill | 2007 | Coleg Meirion Dwyfor, Pwllheli |
| Ebrill | 2007 | Ysgol Uwchradd Botwnnog, Botwnnog |
| Ebrill | 2007 | Ysgol Syr Hugh Owen, Caernarfon |
| Mai | 2007 | Cynulliad Cenedlaethol Cymru, Caerdydd |
| Mai | 2007 | Canolfan Grassroots, Caerdydd |
| Medi | 2007 | Cyfarfod Blynyddol GISDA, Caernarfon |
| Rhagfyr | 2007 | Cynhadledd Llamau, Caerdydd |
| Mawrth | 2008 | Cyfnewidfa Ieuenctid Porto, Portiwgal |
| Medi | 2008 | Cyfarfod Blynyddol GISDA, Caernarfon |
| Hydref | 2008 | Cynulliad Cenedlaethol Cymru, Caerdydd |
| Hydref | 2009 | Ffair Arianwyr, Mantell Gwynedd, Llanberis |
| Tachwedd | 2009 | Cynhadledd ‘Wythnos Ni - Gwynedd’, Bangor |
| Tachwedd | 2009 | Cynhadledd Gadel Cartref, Shelter Cymru, Caerdydd |
| Rhagfyr | 2009 | Rhwydwaith Plant a Phobl Ifanc Gwynedd, Caernarfon |
| Ebrill | 2010 | Partneriaeth Strategol Plant a Phobl Ifanc Gwynedd, Bangor |
| Mawrth | 2010 | Ysgol Uwchradd Moelwyn, Blaenau Ffestiniog |
| Mawrth | 2010 | Ysgol Syr Hugh Owen, Caernarfon |
| Mehefin | 2010 | Cyfarfod Penaethiaid Cyngor Gwynedd, Caernarfon |
| Gorffennaf | 2010 | Gŵyl Theatr Fforwm Sin Telón, Barcelona, Catalwnia |
| Hydref | 2010 | Cydlynwyr Amddiffyn Plant Ysgolion Uwchradd, Porthmadog |
| Tachwedd | 2010 | Wythnos Ni Gwynedd, Glynllifon |
- DVD Fforwm Theatr - Cliciwch yma
- Dyfyniadau Fforwm Theatr - Cliciwch yma
- Sylwadau Fforwm Theatr - Cliciwch yma
Cyfnewidfaoedd Ieuenctid
Heb os mae gwaith theatr fforwm wedi agor drysau i bobl ifanc GISDA gyda gwahoddiadau i fynychu cyfnewidfaoedd ieuenctid ledled Ewrop. Yn ogystal bu i GISDA fod yn gyfrifol am greu cyfnewidfa eu hunain yn 2009.
Yn ystod y cyfnewidfaoedd mae cyfle i bobl ifanc gymryd rhan mewn gweithdai celfyddydol, megis theatr fforwm, dawns, cerdd a drama. Pwrpas y cyfnewidfaoedd yw defnyddio’r celfyddydau i wella ansawdd bywydau pobl ifanc ac i ehangu eu gorwelion.
Hydref |
2006 |
Cyfnewidfa Ieuenctid Denmarc |
Mawrth |
2007 |
Cyfnewidfa Ieuenctid Porto, Portiwgal |
Hydref |
2008 |
Cyfnewidfa Ieuenctid Budapest, Hwngari |
Ionawr |
2009 |
Cyfnewidfa Ieuenctid Bala, Cymru |
Tachwedd |
2009 |
Cyfnewidfa Ieuenctid, Conwy, Cymru |
Gorffennaf |
2010 |
Cyfnewidfa Ieuenctid, Barcelona, Catalwnia |
- Am straeon gan ein pobl ifanc - Cliciwch yma
- Cliciwch yma i weld lluniau o Barcelona 2010
- Cyfnewidfa Ieuenctid - Cliciwch Yma
Mentora Cymheiriaid
Mae mentora cymheiriaid yn gyfle gwych i ddefnyddwyr gwasanaethau gael gwaith gyda GISDA. Mae hyn yn eu galluogi i ehangu eu profiad a datblygu sgiliau newydd.
Drwy fentora cymheiriaid gall y person llwyddiannus fentora’r bobl ifanc yn ein prosiectau.
Bydd y Mentor Cymheiriaid wedi cadw tenantiaeth yn llwyddiannus ac wedi gadael y gwasanaeth am gyfnod o saith mis i un flwyddyn.
Ein gobaith yw y bydd y rôl hon yn gallu ysbrydoli pobl ifanc eraill i ddatblygu, gan fod ein mentor presennol wedi derbyn ein gwasanaeth yn y gorffennol, yn deall y problemau y mae defnyddwyr gwasanaethau’n eu hwynebu ac yn gallu meithrin perthynas dda â nhw.
Beth yw Cymodi?
Mae Cymodi’n broses o negodi wedi i’r berthynas fethu rhwng aelodau teulu neu ffrindiau neu mewn anghydfodau ynghylch tai/tenantiaeth. Mae cyfryngwyr hyfforddedig yn drydydd parti annibynnol sy’n gweithio gydag unigolion heb eu barnu. Bydd cymodi’n caniatáu i’r ddwy ochr egluro eu pryderon a’u hanghenion i’w gilydd ym mhresenoldeb y cyfryngwr; bydd hwnnw, yn ei dro, yn eirioli dros y ddwy ochr sy’n gysylltiedig er mwyn dod o hyd i’w hatebion ymarferol eu hunain i’r gwrthdaro.
Ynghylch y gwasanaeth
Mae’r gwasanaeth yn darparu cymorth Cymodi sy’n gyfrinachol, yn ddiduedd ac am ddim, i alluogi cleientiaid i ddatrys gwrthdaro eu hunain. Nod ychwanegol yw hwyluso gwell cyfathrebu a gwella perthnasoedd rhwng y rhai sy’n rhan o’r anghydfod. Mae’r gwasanaeth Cymodi’n wirfoddol a dim ond os yw’r ddwy ochr yn cytuno y caiff gymryd rhan.
Ar gyfer pwy y mae’r gwasanaeth?
Mae’r Gwasanaeth Cymodi’n gweithio’n bennaf gyda defnyddwyr gwasanaethau o fewn GISDA, sy’n eu cael eu hunain yn rhan o wrthdaro sy’n bygwth eu cartref. Mae’r gwasanaeth ar gael hefyd i’r rheini sy’n eu cael eu hunain yn rhan o wrthdaro o fewn eu prosiectau tai a lle mae anghytundeb rhwng ffrindiau.
 |
 |