Cynhadledd Gwasanaethau Pobl Ifanc

Roedd y diwrnod wedi’i drefnu’n fanwl, gyda lleoliad hyfryd - y Galeri, tywydd braf, ac ymdeimlad cryf o gymuned, cydweithio a balchder. Roedd brand GISDA yn amlwg ym mhob agwedd o’r digwyddiad - yn adlewyrchu’n glir ein gwerthoedd ac ymrwymiad at bobl ifanc.

Un o uchafbwyntiau’r diwrnod oedd y gornel greadigol a baratowyd gan griw talentog Creadigol GISDA. Roedd yma gasgliad o ysgrifau byrion gan pobl sydd wedi cael cefnogaeth gan GISDA dros y 40 mlynedd diwethaf, gan rhannu atgofion pwerus am eu hamser gyda GISDA – arddangosfa emosiynol ac ysbrydoledig.

Cynhaliwyd gweithdai ‘breakout’ amrywiol ar draws adeilad Galeri, gyda phob ystafell yn cael ei ddefnyddio'n llawn. Ymhlith y gweithdai roedd:

• Cyflwyniad i waith GISDA
• Panel ariannu gyda chynrychiolwyr o Plant Mewn Angen, WCVA, a Chronfa Gymunedol y Loteri Genedlaethol
• Gweithdy gan Frân Wen
• Gweithdy gan Adran Gwaith Ieuenctid Gwynedd - Cyngor Gwynedd
• Gweithdy gan Bill Rowlands, End Youth Homelessness Cymru

Cafwyd adborth cadarnhaol iawn gan fynychwyr am safon a phŵer y sesiynau. Rydym yn ddiolchgar i bawb a fu’n rhan o'u cyflwyno – am eu hangerdd, eu mewnwelediad a'u hannogiad.

Siaradwyr a Gwestai Arbennig

Croesawyd nifer o siaradwyr arbennig yn ystod y dydd:

• Sian Tomos, Prif Weithredwr GISDA
• Bill Rowlands, End Youth Homelessness Cymru
• Iwan Trefor Jones, Cymdeithas Tai Adra
• Lewis Williams ac Ann Owen-Williams, Senedd Ieuenctid Cymru
• Y Gwir Anrhydeddus Liz Saville Roberts AS
• Cynghorydd Menna Trenholme, Dirprwy Arweinydd Cyngor Gwynedd
• Anya Sherlock, GISDA
• Zack Robinson, GISDA

I gloi’r diwrnod, cawsom y fraint o groesawu Dafydd Iwan, a roddodd araith bwerus cyn perfformio’r gân ‘Hawl i Fyw’ yn ddigyfeiliant – gan gyfeirio’n deimladwy at bobl Gaza ac at hawliau dynol. Gorffennodd gyda’r anthem eiconig ‘Yma o Hyd’, gan godi’r to a’n calon.